Mar 3 | KQC | STEP | Kamini Iesu bi dubusa usausa yavari dui resi mironari bi amiye vana kevo nufa baku reyo.

c 3.22:Mt 9.34, 10.25

Mark 3

Vana kevo amiye

(Mt 12.9–14; Lk 6.6–11)

1 Kamini Iesu bi dubusa usausa yavari dui resi mironari bi amiye vana kevo nufa baku reyo. 2 Ye amiye be mironari bi vegamadi gokai rego mina Sabati medari ma ini no dada nisi tourage regedi, mina amiye moi buni rigo ri. 3 Iesu yaku mina vana kevo amiye rofu niyo, “Mina amiye tau di nemokori dadisi are re.” 4 Resi ni kaiteyo, “Beika ago gira una rofu nido bi tabu Sabati medari? Vana magiya o esika magiya ba? Amiye di vegu moi rigiya o umuyegiya ba?”

Idu ina vene bi bere niyadi. 5 Iesu bi gubuyo resi amiye ne resi veyo ri, idu mina fuofuori ina vene rofu iriyeduka reyo, adina bi uka gira resi de neideyadi. Mina amiye rofu niyo, “Yi vana ae roto ri.” Ini vana ae roto riyo dubusa dairi buni niyo. 6 Kamini Pharisee vene usausa yava feresi evade Herod di eta rofu vene sa, sina ago ni rorotari reyadi Iesu umuyena dada.

Amiye toragade Galilee koru moka tora seriri

(Lk 6.17–19)

7 Iesu ma ini usi dina vene sa Galilee koru moka torari diyadi, ma amiye taugade ina usi boyadi. Ina bi Galilee eta rofu baiyadi; ka Judea rofu, 8 Jerusalem rofu, Idumea rofu, ma Jordan Koru meda dadido eta rofu, ma gagani Tyre ma Sidon mina taoni eta berouberou okiyadi. Mina amiye taugade Iesu rofu okiyadi ini adina bi neideyadi ini beika regamo dada. 9 Amiye bi taugade dada Iesu ini usi dina vene niyo vanagi yokoi moi tore rei feregedi ma amiye yaku de itei ri foyoma de regedi. ^a 10 Ina bi amiye taugade moi buni riyo, mina dada gauka vene iniyeiniye ebeku regasa ida maina regamadi ina avaka moigedi vo nisi. 11 Ma kaere amiye vima no ini rovaitari bi ina vegamadi ri bi ina adina keto resi raka nigamadi, “Ya bi Sei di Mida!”

12 Ma Iesu yaku ago gira dudu mina vima no niyo, “Amiye yokoi ga ni na bi kaere.”

Iesu ini ni feidena vene tuero moiyo

(Mt 10.1–4; Lk 6.12–16)

13 Kamini Iesu bi omuna odorori boyo, ini ura bi rumana vene be abidi rego. Resi mina rumana vene raka niyo ma baiyadi. 14 Ma ina yaku rumana vene tuero ina sa ameyaganedi abidi resi bi ni feidena vene roka maro. Mina bi disi ini ago ni rausi reyagane dada. 15 Ma vava maro; mina vava dudu bi vima no meki regedi.

16 Ina yaku amiye tuero abidi reyo bi mini: Simon (Iesu ini roka maro bi Peter); 17 ma James ini dubuini John sa, Zebedee di midamida (Iesu ini roka maro bi Boanerges, mina ini adina bi, “Oma yaku ofu tu nido kana di mida”); 18 ma Andrew, Philip, Bartholomew, Matthew, Thomas, ma James, Alphaeus di mida, ma Thaddaeus, ma Simon, ina bi zealot ^{▼▼3.18Zealot bi Rome vene tourage regi regamo amiye.} di amiye yokoi. 19 Ma Judas Iscariot kaere bi Iesu tautore reyo amiye.

Iesu ma vima no di tora Beelzebul

(Mt 12.22–32; Lk 11.14–23; 12.10)

20 Kamini Iesu bi yavari dairiyo, ma rema rumana dubusa egogo reyadi; ye Iesu ini usi dina vene sa ini iriiri ari bi ebu reyo. 21 Iesu di ini davatu vene yaku ini moimai regamo sina nido neideyadi ri bi dadisi neyadi beika nido bi ga niyainedi, adina amiye bi nigamadi, “Ina bi forovai reyo!”

22 Ago gira ni feidena vene be, kaere bi Jerusalem ri gutuna deyadi, yaku nigamadi, “Vima no Beelzebul bi ini rovaitari dui reyo, dada vima no di tora yaku vava mado ma vima no meki redo.” ^c

23 Ye Iesu bi amiye raka ni egogo resi mokena ago ni oteimagamo. Resi yomakai ago niyo, “Gokai dudu Satani yaku Satani iniye umeki rego? 24 Bema gagani yokoi uta okusi iniyeiniye berouberou are resi ruda regedi ri berouberou keto regedi. 25 Ma bema rubu iniyeiniye berouberou ruda regedi ri bi berouberou keto regedi. 26 Bema Satani iniyeiniye berouberou are resi ruda regedi ri ina bi are rei gira de regedi. Tutumui digedi.

27 “Amiye yeiva yokoi di yava bi ufeiya resi ini gugura fore de moigo. Iniye ni siko rego bi mina amiye yeiva bi ukita rigo rofu mamo ini gugura fore duma rego.

28 “Mina ago bi rama ya vene rofu nida, ‘Sei bi amiye di vegu no ma no nigedi ago bi koite makugo.’ ^{▼▼3.28no nigedi ago;oina rofu no nigedi ago.} 29 Bema kaere amiye yaku Vima Kikifa rofu ini roka moi no rigo ri bi Sei yaku ini vegu no de koite makugo. Ini vegu no di toe bi toga ameibigo.” ^e 30 (Makai niyo adina bi niyadi, “Ina bi vima no ina sa amedo.”)

Iesu ini nono ma ini dubuiyaka sa

(Mt 12.46–50; Lk 8.19–21)

31 Kamini Iesu ini nono ma ini dubuiyaka sa okisi yava etofarori are regamadi. Resi ago ina rofu ni feideyadi. 32 Amiye taugade bi ina sa amei desi egoru regamadi, ma ina rofu niyadi, “Yi nono ma yi dubuiyaka ^{▼▼3.32Bura bedakai bima tobaiyakanufa.} bi etofaro ya yaku ni kaitededi.”

33 Kamini ni kaitesi niyo, “Kaere bi nai nono ma kaere bi nai dubuiyaka?” 34 Resi amiye amei desi reyadi ri, mina vesi niyo, “Vefo, mina vene bi nai nono ma nai dubuiyaka! 35 Ya kaere Sei di mokenari beika regiya bi ya bi nai dubuini, nai tobaini, ma nai nono.”